溫思勞街上的紙紮店

(老闆本意，也不想高調，不太想上網；但聊天內容實在太有趣，唯將其名隱之，與大家分享 )

本來也不覺察這兒有一家紙紮店 – 毫不起眼的外觀，不如鄰近的花牌店般燈光通明；加上晚上八時多，大概是準備關門吧，門也半掩著。還好，朋友眼尖，看到裏面的紙紮；也夠膽粗，走了入去 – 因為工作，他需要一個紙紮。

又本來 – 只是想在外面稍等一等，順道處理一下事務；事辦好了，朋友還沒有出來，好奇，走了入去；老闆娘很健談，居然已開始談到紙紮店的前世今生。

我一直都以為，這一帶的紙紮店都只是家族生意，但居然機緣太巧合，這家不是。

「這兒，是我丈夫白手 (興家) 的」開業二十多年，甚麼都要捱：「這個舖位都是我丈夫捱出來的」幸好。講起兩街之隔的大光燈 - 當年一眾廣播劇前輩極力推介的老字號麵店，最近也不敵瘋狂加租而被迫結業；「豆腐潤咁細都要收佢三萬蚊租！」再一次幸好，老闆當初有先見之明，死捱都要買下此舖位。這兒絕不是豆腐潤，要加起租來，恐怕真要六七萬一個月，點頂？

但就算有了自己舖，都不代表可以「歎世界」：「我日日都食『翅』架！」吓，日日都食翅咁好景，我有冇聽錯？還好老闆娘接了下去：「日日都會俾啲竹刺親！」原來是食「刺」，刺傷的刺。 每天和竹鬥法，難免會被竹片刺傷刮傷。 同為女人，完全能想像自己一雙纖纖玉手不斷被刺傷刮傷之下的痛楚 (手上和心中) ；同為女人，完全能體會，她為這店放棄了多少。

一分一毫賺來都是辛苦錢。如今更見艱難。經濟不景之下，肯花大錢買金銀衣紙來燒的人，日益見少。

那麼，如今愈來愈多人篤信基督，不信燒衣紙這一套，會否有影響？ 「唉，基督教害人啊 」滿懷感觸地說。

但這感觸，不光是因影響生意，更多的，是慨嘆傳統文化受到違棄。

「我見過很多，仔女自己信基督教，明明父母唔信的，都堅持唔燒衣紙俾父母，有啲仲因此同屋企人嗌交.....唉，基督教分化人啊。」感慨萬千。

但感慨當中，趣事也不少；有人因信仰而堅持不燒衣紙給往生的父親；結果，父親報夢，說在下面冇錢使；教徒哭喪著臉找老闆娘：點算好啊？

老闆娘教路，燒衣紙這會事，寧可信其有，不可信其無，簡單燒個衣包，入面有錢應夠先人用的。筆者想起每年清明都燒衣給外婆的老媽，有年遲了兩天燒，都收到外婆報夢；娘親那副一把年紀仍花容失色的模樣，至今仍記得。

講起報夢，笑料還多得很； 「客家那些水上人家，他們傳統會於紙紮上用煙頭『辣』幾個洞；」大概都是刻板工作中的調味品，老闆娘講得特別開心：  「有次有個客聽佢親戚講照做，響燒俾佢阿爸的紙紮上辣了幾個洞；但點知，之後佢阿爸報夢話：『仔啊，間屋漏水啊，點算？』」

我們都禁住大笑出來「咁點算啊？」「佢都咁問我啊！冇得算架喇，唯有燒多次啦！」可謂大損失；但最甘的，原來不是買多份紙紮，而是要租爐 - 所以老闆娘提醒大家，要燒，都要小心諗清楚有否甩漏。

老闆娘健談，轉數快，也幽默，所以，她的紙紮也會與時並進。最新款電子產品，當然唔少得。

「那，會有先人報夢上來投訴說不會用 iphone或ipad 嗎？」
「唏！有工人架嘛！通常會燒兩個工人俾佢，加上屋入面都會有兩個 ….工人可以幫佢架嘛！而家就算係有老人家唔識用電話都係工人幫佢『禁』架啦！」又係喎。

但現在很少本地工人吧？「菲傭我都造過！」嘩喂，那些紙紮人都是粉紅色的啊，點分？「油黑佢咪係菲傭囉！印傭都係咁架喇！」我又忍不住笑了出來。真想看看，可惜當時沒有。

也因為與時並進，讓老闆娘練多一身好本領；因為要避免燃燒時製造有毒氣體，對紙紮原料的限制，近十年來，愈來愈嚴格； 紙紮的功夫，得要愈來愈靈巧。「以前可以用發泡膠，瓦通紙做牌匾，屋，等；而在都唔得，唯有用紙啊；紙係得咁薄，係考功夫咗！」隨著時代更替而驅使手藝日益精巧的，紙紮業恐時少數。

「以前人們會燒先著過嘅衫....真正嘅衫，去燒；而家都唔得啦！」但元寶香燭一大堆，不怕家屬魚目混珠嗎？「所以一定要攞上手，聚手的，多數唔止得紙，我會叫佢哋攞返出嚟。」把關都做埋。

但手藝再進步，在其他傳統行業一樣，也難逃式微的命運；紙紮辛苦，「日日食刺」，工時又長，和很多傳統的行業一樣，辛苦；做父母的，會想他們舒舒服服地打份寫字樓工，還是辛辛苦苦繼承衣鉢呢？

 

很可惜，但又現實得很。